jo imtihan-e-wafa ko wo tund-KHu aae

jo imtihān-e-vafā ko vo tund-ḳhū aa.e

tirā jigar nahīñ ai bul-havas ke tū aa.e

hai istifāda-e-sohbat ko shart istedād

muhāl hai kabhī kāñToñ meñ gul kī bū aa.e

vo sajda kyoñ na kare be-ḳhudī meñ chaar taraf

tirā hī jalva nazar jis ko chār-sū aa.e

jab aa.e tum to baḌhāne ko aa.e hasrat ke

kabhī nikālne ko merī aarzū aa.e

ye kah rahā hai kisī kā jamāl-e-hosh-rubā

kare jo hosh kā da.avā vo rū-ba-rū aa.e

hujūm-e-yās se dil bhar gayā ye ḳhuub huā

jagah nahīñ rahī baaqī ki aarzū aa.e

bahār-e-ashk hue us galī meñ rusvā ham

milā.e ḳhaak meñ motī sī aabrū aa.e

nasīm tujh ko mubārak bahār kā aanā

qafas meñ huuñ mujhe kyā lutf-e-rang-o-bū aa.e

butoñ kī saarī haqīqat barahmno khul jaa.e

abhī zabān par apnī jo ek hū aa.e

haram thā duur na chūmā jo sang-e-asvad ko

sanam-kade meñ butoñ ke qadam to chhū aa.e

use hayā nahīñ kahte ye zulm hai zālim

ġhazab hai ḳhvāb meñ bhī muñh chhupā ke tū aa.e

ḳhudā kī shaan ke qurbān o but-e-bedard

tasalliyāñ mujhe dene ko aur tū aa.e

'ḳhayāl' vasl kī shab hijr kā gila kaisā

ḳhushī meñ kyoñ koī ranjish kī bū aa.e

jo imtihan-e-wafa ko wo tund-KHu aae

tera jigar nahin ai bul-hawas ke tu aae

hai istifada-e-sohbat ko shart istedad

muhaal hai kabhi kanTon mein gul ki bu aae

wo sajda kyon na kare be-KHudi mein chaar taraf

tera hi jalwa nazar jis ko chaar-su aae

jab aae tum to baDhane ko aae hasrat ke

kabhi nikalne ko meri aarzu aae

ye kah raha hai kisi ka jamal-e-hosh-ruba

kare jo hosh ka dawa wo ru-ba-ru aae

hujum-e-yas se dil bhar gaya ye KHub hua

jagah nahin rahi baqi ki aarzu aae

bahaar-e-ashk hue us gali mein ruswa hum

milae KHak mein moti si aabru aae

nasim tujh ko mubarak bahaar ka aana

qafas mein hun mujhe kya lutf-e-rang-o-bu aae

buton ki sari haqiqat barahmno khul jae

abhi zaban par apni jo ek hu aae

haram tha dur na chuma jo sang-e-aswad ko

sanam-kade mein buton ke qadam to chhu aae

use haya nahin kahte ye zulm hai zalim

ghazab hai KHwab mein bhi munh chhupa ke tu aae

KHuda ki shan ke qurban o but-e-bedard

tasalliyan mujhe dene ko aur tu aae

'KHayal' wasl ki shab hijr ka gila kaisa

KHushi mein kyon koi ranjish ki bu aae