jo is chaman mein ye gul sarw-o-yasman ke hain

jo is chaman meñ ye gul sarv-o-yāsman ke haiñ

ye jitne rañg haiñ sab tere pairahan ke haiñ

ye sab karishma-e-arz-e-hunar usī ke haiñ

guloñ meñ naqsh tire hī lab-o-dahan ke haiñ

tabī.atoñ meñ ajab rañg-e-ajnabiyyat hai

ye shāh-pāre to sab tere arz-e-fan ke haiñ

havas meñ ishq meñ tahzīb-e-tarbiyat kā hai farq

vagarna donoñ usī maktab-e-badan ke haiñ

hameñ to lā ke yahāñ par basā diyā gayā hai

ḳhabar hai mulk-e-adam ham tire vatan ke haiñ

amīr-e-shahr tū apnī qabā-e-zar ko bhī dekh

sab is meñ taar mire reza-e-kafan ke haiñ

kahāñ akele mirī ḳhvāhishoñ kā dam niklā

nishāñ bhī us ke gale par mirī ghuTan ke haiñ

ḳhud apne shahr kī tahzīb bhuul baiThe haiñ

ye kaun log haiñ aur jaane kaise ban ke haiñ

mere harīf mirā ehtirām karte haiñ

suḳhan-varoñ meñ bhī charche mire suḳhan ke haiñ

jo is chaman mein ye gul sarw-o-yasman ke hain

ye jitne rang hain sab tere pairahan ke hain

ye sab karishma-e-arz-e-hunar usi ke hain

gulon mein naqsh tere hi lab-o-dahan ke hain

tabiaton mein ajab rang-e-ajnabiyyat hai

ye shah-pare to sab tere arz-e-fan ke hain

hawas mein ishq mein tahzib-e-tarbiyat ka hai farq

wagarna donon usi maktab-e-badan ke hain

hamein to la ke yahan par basa diya gaya hai

KHabar hai mulk-e-adam hum tere watan ke hain

amir-e-shahr tu apni qaba-e-zar ko bhi dekh

sab is mein tar mere reza-e-kafan ke hain

kahan akele meri KHwahishon ka dam nikla

nishan bhi us ke gale par meri ghuTan ke hain

KHud apne shahr ki tahzib bhul baiThe hain

ye kaun log hain aur jaane kaise ban ke hain

mere harif mera ehtiram karte hain

suKHan-waron mein bhi charche mere suKHan ke hain