jo is zamin pe rahte the aasman se log

jo is zamīn pe rahte the āsmān se log

kahāñ ga.e vo mire saare mehrbān se log

ye be-charāġh sī bastī ye be-sadā galiyāñ

har ek samt ye ujḌe hue makān se log

sar-e-navishta-e-taqdīr ḳhvāb kī sūrat

likhe haiñ ret pe kuchh harf-e-rā.egān se log

ki ye asar to nahīñ un kī fāqa-mastī kā

phir aaj tañg hue haiñ jo apnī jaan se log

kuchh is meñ hasb-e-zarūrat kiye ga.e shāmil

kuchh ham ne hazf kiye apnī dāstān se log

abhī na ḳhatm huā thā fasāna-e-hastī

gurez karne lage apne darmiyān se log

paḌī hai ret pe TuuTī huī vo kashtī-e-ḳhāk

ki uḌ rahe haiñ havāoñ meñ bādbān se log

tujhe to apnī hī jaañ kī paḌī huī hai 'kamāl'

guzar rahe haiñ yahāñ par kis imtihān se log

jo is zamin pe rahte the aasman se log

kahan gae wo mere sare mehrban se log

ye be-charagh si basti ye be-sada galiyan

har ek samt ye ujDe hue makan se log

sar-e-nawishta-e-taqdir KHwab ki surat

likhe hain ret pe kuchh harf-e-raegan se log

ki ye asar to nahin un ki faqa-masti ka

phir aaj tang hue hain jo apni jaan se log

kuchh is mein hasb-e-zarurat kiye gae shamil

kuchh hum ne hazf kiye apni dastan se log

abhi na KHatm hua tha fasana-e-hasti

gurez karne lage apne darmiyan se log

paDi hai ret pe TuTi hui wo kashti-e-KHak

ki uD rahe hain hawaon mein baadban se log

tujhe to apni hi jaan ki paDi hui hai 'kamal'

guzar rahe hain yahan par kis imtihan se log