jo ishq ko khel samajhte hain wo gham ki lazzat kya jaanen

jo ishq ko khel samajhte haiñ vo ġham kī lazzat kyā jāneñ

jo kho.e ga.e haiñ vahdat meñ irfān-e-kasrat kyā jāneñ

iflās ke maare ham kyūñkar apne dil ko bahlāte haiñ

āshufta-e-daulat kyā jāneñ ḳhvābīda-e-rāhat kyā jāneñ

shaidā hai koī taraqqī kā ḳhā.if hai koī tanazzul se

daur-e-gardūn-e-mudavvar kī ye log ahmiyat kyā jāneñ

munkir haiñ ḳhudā kī hastī se jo aap ḳhudā ban baiThe haiñ

īmān kī rif.at kyā jāneñ mastī kī vus.at kyā jāneñ

bāzī-e-hayāt-o-maut mujhe aarī nahīñ maqsad-e-aulā se

parde ke pīchhe kyā kyā hai be-nūr basīrat kyā jāneñ

har qaul-o-fe.al do-ālam kā vo ek muharrik-o-nāzim hai

hasanāt-e-nazm se be-bahra sheriyat-e-ḳhilqat kyā jāneñ

har mausam kā husn apnā hai har diin kā nashsha apnā hai

har ahd kī apnī qīmat hai ham farq kī azmat kyā jāneñ

jo ishq ko khel samajhte hain wo gham ki lazzat kya jaanen

jo khoe gae hain wahdat mein irfan-e-kasrat kya jaanen

iflas ke mare hum kyunkar apne dil ko bahlate hain

aashufta-e-daulat kya jaanen KHwabida-e-rahat kya jaanen

shaida hai koi taraqqi ka KHaif hai koi tanazzul se

daur-e-gardun-e-mudawwar ki ye log ahmiyat kya jaanen

munkir hain KHuda ki hasti se jo aap KHuda ban baiThe hain

iman ki rifat kya jaanen masti ki wusat kya jaanen

bazi-e-hayat-o-maut mujhe aari nahin maqsad-e-aula se

parde ke pichhe kya kya hai be-nur basirat kya jaanen

har qaul-o-feal do-alam ka wo ek muharrik-o-nazim hai

hasanat-e-nazm se be-bahra sheriyat-e-KHilqat kya jaanen

har mausam ka husn apna hai har din ka nashsha apna hai

har ahd ki apni qimat hai hum farq ki azmat kya jaanen