jo justuju karun har raaz pa bhi sakta hun

jo justujū karūñ har raaz pā bhī saktā huuñ

maiñ kā.enāt se parda uThā bhī saktā huuñ

mire buzurgoñ ne baḳhshī hai ik duā aisī

bichhaḌ ga.e haiñ jo un ko milā bhī saktā huuñ

na koī zā.icha khīñchūñ na dekhūñ haath tirā

maiñ tere baare meñ sab kuchh batā bhī saktā huuñ

bas ek raat maiñ sajde meñ gir ke royā thā

ab āsmāñ ko zamīñ par jhukā bhī saktā huuñ

abhī to soch safar hai azal kī samt magar

palaT ke sū-e-abad phir se jā bhī saktā huuñ

mujhe ḳhudā ne vo baḳhshā hai shā.irī kā hunar

jo ḳhvāb dekhtā huuñ vo dikhā bhī saktā huuñ

ye māntā huuñ ki aarif huuñ karbalā se duur

magar maiñ hur kī tarah sar kaTā bhī saktā huuñ

jo justuju karun har raaz pa bhi sakta hun

main kaenat se parda uTha bhi sakta hun

mere buzurgon ne baKHshi hai ek dua aisi

bichhaD gae hain jo un ko mila bhi sakta hun

na koi zaicha khinchun na dekhun hath tera

main tere bare mein sab kuchh bata bhi sakta hun

bas ek raat main sajde mein gir ke roya tha

ab aasman ko zamin par jhuka bhi sakta hun

abhi to soch safar hai azal ki samt magar

palaT ke su-e-abad phir se ja bhi sakta hun

mujhe KHuda ne wo baKHsha hai shairi ka hunar

jo KHwab dekhta hun wo dikha bhi sakta hun

ye manta hun ki aarif hun karbala se dur

magar main hur ki tarah sar kaTa bhi sakta hun