jo kashmakash thi tera intizar karte hue

jo kashmakash thī tirā intizār karte hue

jhijak rahā huuñ use āshkār karte hue

kasīlī dhuup kī shiddat ko bhī nazar meñ rakho

kisī daraḳht ko be-barg-o-bār karte hue

guzishta saal kī āfāt kab ḳhayāl meñ thiiñ

nashemanoñ ko supurd-e-bahār karte hue

kisī ne apne girebāñ meñ kyā talāsh kiyā

hamāre raqs-e-vafā kā shumār karte hue

havā ke paañv bhī shal ho ke rah ga.e aksar

tire nagar kī fasīloñ ko paar karte hue

yahī huā ki samundar ko pī ke baiTh ga.ī

hamārī naav safar iḳhtiyār karte hue

usī ke vāste 'sultān' be-qarār haiñ ham

jise qarār mile be-qarār karte hue

jo kashmakash thi tera intizar karte hue

jhijak raha hun use aashkar karte hue

kasili dhup ki shiddat ko bhi nazar mein rakho

kisi daraKHt ko be-barg-o-bar karte hue

guzishta sal ki aafat kab KHayal mein thin

nashemanon ko supurd-e-bahaar karte hue

kisi ne apne gireban mein kya talash kiya

hamare raqs-e-wafa ka shumar karte hue

hawa ke panw bhi shal ho ke rah gae aksar

tere nagar ki fasilon ko par karte hue

yahi hua ki samundar ko pi ke baiTh gai

hamari naw safar iKHtiyar karte hue

usi ke waste 'sultan' be-qarar hain hum

jise qarar mile be-qarar karte hue