jo KHatm ho gai thi wo baat chal rahi hai

jo ḳhatm ho ga.ī thī vo baat chal rahī hai

ik sarḳhushī kā aalam bārāt chal rahī hai

tārīkiyoñ ke andar ik raat chal rahī hai

aur raat ke jilau meñ ik ghaat chal rahī hai

kyā kyā bisāt maiñ bhī phailā chukā thā lekin

in meñ kisī pe merī bhī maat chal rahī hai

milne ke sab bahāne nākām ho chuke haiñ

vo kah chuke haiñ mujh se barsāt chal rahī hai

nok-e-qalam pe ḳhushkī tahrīr bhī baġhal meñ

ham kyā batā.eñ kyūñkar vo saat chal rahī hai

maiñ ne hī kah diyā thā tum saath saath chalnā

duniyā ab aage pīchhe bad-zāt chal rahī hai

vo bhī basar huī thī ye bhī guzar rahī hai

donoñ ke pesh-o-pas meñ auqāt chal rahī hai

donoñ ke dast-o-bāzū ik dūsre pe uTThe

jang-o-jidāl kaisī haihāt chal rahī hai

jo KHatm ho gai thi wo baat chal rahi hai

ek sarKHushi ka aalam baraat chal rahi hai

tarikiyon ke andar ek raat chal rahi hai

aur raat ke jilau mein ek ghat chal rahi hai

kya kya bisat main bhi phaila chuka tha lekin

in mein kisi pe meri bhi mat chal rahi hai

milne ke sab bahane nakaam ho chuke hain

wo kah chuke hain mujh se barsat chal rahi hai

nok-e-qalam pe KHushki tahrir bhi baghal mein

hum kya bataen kyunkar wo sat chal rahi hai

main ne hi kah diya tha tum sath sath chalna

duniya ab aage pichhe bad-zat chal rahi hai

wo bhi basar hui thi ye bhi guzar rahi hai

donon ke pesh-o-pas mein auqat chal rahi hai

donon ke dast-o-bazu ek dusre pe uTThe

jang-o-jidal kaisi haihat chal rahi hai