jo kho chuke hain wo manzar talash karti hun

jo kho chuke haiñ vo manzar talāsh kartī huuñ

bikhar ga.e haiñ jo paikar talāsh kartī huuñ

kabhī talāsh jo karnā ho apnā aap mujhe

to us kī zaat ke andar talāsh kartī huuñ

bichhaḌ ga.ī huuñ maiñ us se magar nahīñ bichhḌī

jo band us ne kiye dar talāsh kartī huuñ

kabhī jo had se guzar jaa.e dukh to hañstī huuñ

ḳhushī nahīñ jo mayassar talāsh kartī huuñ

qarīb rah ke bhī kartī rahī thī qurb talāsh

maiñ chāhatoñ ke hī zevar talāsh kartī huuñ

ye aarzū hai sanam ko qarīb-tar dekhūñ

so regzār meñ patthar talāsh kartī huuñ

karūñgī us kā tavāf umr bhar maiñ bas 'shāhīñ'

ab apnā markaz-o-mehvar talāsh kartī huuñ

jo kho chuke hain wo manzar talash karti hun

bikhar gae hain jo paikar talash karti hun

kabhi talash jo karna ho apna aap mujhe

to us ki zat ke andar talash karti hun

bichhaD gai hun main us se magar nahin bichhDi

jo band us ne kiye dar talash karti hun

kabhi jo had se guzar jae dukh to hansti hun

KHushi nahin jo mayassar talash karti hun

qarib rah ke bhi karti rahi thi qurb talash

main chahaton ke hi zewar talash karti hun

ye aarzu hai sanam ko qarib-tar dekhun

so regzar mein patthar talash karti hun

karungi us ka tawaf umr bhar main bas 'shahin'

ab apna markaz-o-mehwar talash karti hun