jo KHud ko jaan sake wo bashar bashar ho jae

jo ḳhud ko jaan sake vo bashar bashar ho jaa.e

tirī ḳhabar ho usī ko jo be-ḳhabar ho jaa.e

agar tum aao shab-e-hijr muḳhtasar ho jaa.e

ye shām-e-ġham bhī mirī eid kī sahar ho jaa.e

isī ḳhayāl ke pāband ho ke jiite haiñ

tumhārī yaad meñ ye zindagī basar ho jaa.e

har ek zarra meñ mil jaa.e mujh ko ik manzil

jo shauq-e-dīd faqat merā rāhbar ho jaa.e

karūñ jo tark havā-o-havas kā nazārā

jame nazar to haqīqat vo jalva-gar ho jaa.e

kamāl-e-shauq meñ manzil se qurb ho to gayā

mazā to jab hai ki raftār tez-tar ho jaa.e

jahāñ mazār banā tujh pe marne vaale kā

vo kyoñ na ahl-e-mohabbat kī rahguzar ho jaa.e

haTā le dil ko agar 'zabt' ahl-e-duniyā se

barābar us kī nigāhoñ meñ ḳhair-o-shar ho jaa.e

jo KHud ko jaan sake wo bashar bashar ho jae

teri KHabar ho usi ko jo be-KHabar ho jae

agar tum aao shab-e-hijr muKHtasar ho jae

ye sham-e-gham bhi meri eid ki sahar ho jae

isi KHayal ke paband ho ke jite hain

tumhaari yaad mein ye zindagi basar ho jae

har ek zarra mein mil jae mujh ko ek manzil

jo shauq-e-did faqat mera rahbar ho jae

karun jo tark hawa-o-hawas ka nazara

jame nazar to haqiqat wo jalwa-gar ho jae

kamal-e-shauq mein manzil se qurb ho to gaya

maza to jab hai ki raftar tez-tar ho jae

jahan mazar bana tujh pe marne wale ka

wo kyon na ahl-e-mohabbat ki rahguzar ho jae

haTa le dil ko agar 'zabt' ahl-e-duniya se

barabar us ki nigahon mein KHair-o-shar ho jae