jo KHum par KHum chhalkate hain honTon ki thakan kya samjhenge

jo ḳhum par ḳhum chhalkāte haiñ hoñToñ kī thakan kyā samjheñge

phūloñ meñ guzartī hai jin kī kāñToñ kī chubhan kyā samjheñge

patthar ke pujārī āñkhoñ kī gahrā.ī ko paanā kyā jāneñ

qismat pe yaqīñ rakhne vaale māthe kī shikan kyā samjheñge

ham dīvāne haiñ dīvāne bekār sabaq dete ho hameñ

ham maut ke ma.anī kiyā jāneñ ham dār-o-rasan kyā samjheñge

kyā dukh hai hameñ kyā ġham hai hameñ kyuuñ jaa.eñ kisī se kahne ko

kaliyoñ kī jau izzat kar na sake vo dard-e-chaman kyā samjheñge

kyuuñ nāhaq le kar baiTh ga.e ġham-hā-e-musalsal kā qissa

vo dard kī qīmat kyā jāneñ vo dil kī jalan kyā samjheñge

jo KHum par KHum chhalkate hain honTon ki thakan kya samjhenge

phulon mein guzarti hai jin ki kanTon ki chubhan kya samjhenge

patthar ke pujari aankhon ki gahrai ko pana kya jaanen

qismat pe yaqin rakhne wale mathe ki shikan kya samjhenge

hum diwane hain diwane bekar sabaq dete ho hamein

hum maut ke mani kiya jaanen hum dar-o-rasan kya samjhenge

kya dukh hai hamein kya gham hai hamein kyun jaen kisi se kahne ko

kaliyon ki jau izzat kar na sake wo dard-e-chaman kya samjhenge

kyun nahaq le kar baiTh gae gham-ha-e-musalsal ka qissa

wo dard ki qimat kya jaanen wo dil ki jalan kya samjhenge