jo KHush-nasib tere ishq mein KHarab hue

jo ḳhush-nasīb tere ishq meñ ḳharāb hue

ba-e-e'tibār-e-haqīqat vo kāmyāb hue

ġham-e-davām ke asrār be-naqāb hue

ye chand jur.e kahāñ tak asar-ma-āb hue

mirī nigāh meñ vo jalve sehr-kār nahīñ

jo jalve aam nigāhoñ meñ be-naqāb hue

chalā maiñ un kā tasavvur kiye hue jis vaqt

jo zarre raah meñ aa.e vo āftāb hue

tirī qarābat unheñ bhī kahāñ mayassar hai

tire jamāl-kade meñ jo bāryāb hue

karishma-sāzī-e-jazbāt-e-ishq are tauba

haqīr zarre tire husn kā javāb hue

idhar banāyā hai qasr-e-tasavvurāt-e-jamīl

udhar ham un ke liye ḳhānumāñ-ḳharāb hue

ye hādsāt-e-mohabbat are ḳhudā kī panāh

tumhārī bazm meñ 'bismil' bhī bāryāb hue

jo KHush-nasib tere ishq mein KHarab hue

ba-e-e'tibar-e-haqiqat wo kaamyab hue

gham-e-dawam ke asrar be-naqab hue

ye chand jure kahan tak asar-ma-ab hue

meri nigah mein wo jalwe sehr-kar nahin

jo jalwe aam nigahon mein be-naqab hue

chala main un ka tasawwur kiye hue jis waqt

jo zarre rah mein aae wo aaftab hue

teri qarabat unhen bhi kahan mayassar hai

tere jamal-kade mein jo baryab hue

karishma-sazi-e-jazbaat-e-ishq are tauba

haqir zarre tere husn ka jawab hue

idhar banaya hai qasr-e-tasawwuraat-e-jamil

udhar hum un ke liye KHanuman-KHarab hue

ye hadsat-e-mohabbat are KHuda ki panah

tumhaari bazm mein 'bismil' bhi baryab hue