jo lab pe na laun wahi sheron mein kahun main

jo lab pe na lā.ūñ vahī sheroñ meñ kahūñ maiñ

yuuñ ā.īna-e-hasrat-e-guftār banūñ maiñ

ā.īna-e-āġhāz meñ dekhūñ ruḳh-e-anjām

kaliyoñ ke chaTakne kī sadā se bhī Darūñ maiñ

mere liye ḳhalvat bhī hai hañgāme kī sūrat

vo shor-e-tamannā hai ki kis kis ko sunūñ maiñ

Thahro to ye ghar kyā dil-o-jāñ bhī haiñ tumhāre

jaate ho to kyuuñ raah kī dīvār banūñ maiñ

har gaam nigāhoñ se lipaT uThte haiñ sho.ale

aur dil kī yahī zid hai isī raah chalūñ maiñ

har ek nazar ābla-pā dekh rahā huuñ

baste hue shahroñ ko bhī sahrā hī kahūñ maiñ

koī bhī sar-e-dār charāġhāñ nahīñ kartā

aur sab kī tamannā hai ki mansūr banūñ meñ

naqqāshī-e-taḳh.īl se ghabrā sā gayā huuñ

kab tak yūñhī ḳhvāboñ ke jazīroñ meñ rahūñ maiñ

jo le gayā jaan o jigar o dil sar-e-rāhe

vo ghar mire aa jaa.e to kyā nazr karūñ maiñ

mujh ko hai junūñ zamzama-e-barg-e-ḳhizāñ kā

patjhaḌ ke liye gosh-bar-āvāz rahūñ maiñ

'sādiq' mujhe manzūr nahīñ in kī numā.ish

har chand ki zaḳhmoñ kā ḳharīdār to huuñ maiñ

jo lab pe na laun wahi sheron mein kahun main

yun aaina-e-hasrat-e-guftar banun main

aaina-e-aghaz mein dekhun ruKH-e-anjam

kaliyon ke chaTakne ki sada se bhi Darun main

mere liye KHalwat bhi hai hangame ki surat

wo shor-e-tamanna hai ki kis kis ko sunun main

Thahro to ye ghar kya dil-o-jaan bhi hain tumhaare

jate ho to kyun rah ki diwar banun main

har gam nigahon se lipaT uThte hain shoale

aur dil ki yahi zid hai isi rah chalun main

har ek nazar aabla-pa dekh raha hun

baste hue shahron ko bhi sahra hi kahun main

koi bhi sar-e-dar charaghan nahin karta

aur sab ki tamanna hai ki mansur banun mein

naqqashi-e-taKHil se ghabra sa gaya hun

kab tak yunhi KHwabon ke jaziron mein rahun main

jo le gaya jaan o jigar o dil sar-e-rahe

wo ghar mere aa jae to kya nazr karun main

mujh ko hai junun zamzama-e-barg-e-KHizan ka

patjhaD ke liye gosh-bar-awaz rahun main

'sadiq' mujhe manzur nahin in ki numaish

har chand ki zaKHmon ka KHaridar to hun main