jo likhna chaha na likh paya main KHuda afsos

jo likhnā chāhā na likh paayā maiñ ḳhudā afsos

so rah gayā mirī tahrīr meñ ḳhalā afsos

har ek ḳhvāb ko ashkoñ se dhaar kar maiñ ne

jo dekhā dil to dikhā jā-ba-jā paḌā afsos

bisāt-e-jāñ meñ rahā raqs ḳhvāhishoñ kā magar

chhalak ke āñkhoñ se ashkoñ ne kah diyā afsos

ajab nahīñ hai tū kyā hai koī batā.e mujhe

yahāñ pe jo bhī milā mil ke ye kahā afsos

maiñ apne hāthoñ se ban ban ke ret jab niklā

to merā saayā bhī kahte hue chalā afsos

uThā ke laa.ī jo taqdīr aa.ine ke huzūr

to darj chehre pe aur aa.ine meñ thā afsos

jo aks maiñ ne ubhārā thā dil ke kāġhaz par

qadam qadam pe nadāmat vahī banā afsos

maiñ ḳhvāhishoñ ke janāze ko paḌh ke ghar aayā

kisī ke chehre pe ḳhushiyāñ kisī ke thā afsos

vo ek mauj-e-'nasīmī' thī vahshat-e-dil kī

kisī ke hijr meñ jis ko bahā diyā afsos

likhā huā thā muqaddar meñ pī gayā khul kar

to kaise kah duuñ ke pī kar mujhe huā afsos

jo likhna chaha na likh paya main KHuda afsos

so rah gaya meri tahrir mein KHala afsos

har ek KHwab ko ashkon se dhaar kar main ne

jo dekha dil to dikha ja-ba-ja paDa afsos

bisat-e-jaan mein raha raqs KHwahishon ka magar

chhalak ke aankhon se ashkon ne kah diya afsos

ajab nahin hai tu kya hai koi batae mujhe

yahan pe jo bhi mila mil ke ye kaha afsos

main apne hathon se ban ban ke ret jab nikla

to mera saya bhi kahte hue chala afsos

uTha ke lai jo taqdir aaine ke huzur

to darj chehre pe aur aaine mein tha afsos

jo aks main ne ubhaara tha dil ke kaghaz par

qadam qadam pe nadamat wahi bana afsos

main KHwahishon ke janaze ko paDh ke ghar aaya

kisi ke chehre pe KHushiyan kisi ke tha afsos

wo ek mauj-e-'nasimi' thi wahshat-e-dil ki

kisi ke hijr mein jis ko baha diya afsos

likha hua tha muqaddar mein pi gaya khul kar

to kaise kah dun ke pi kar mujhe hua afsos