jo log bhi dar se tere mansub rahe hain

jo log bhī dar se tire mansūb rahe haiñ

firdaus ke vo phir kahāñ matlūb rahe haiñ

hāsil hai sharaf jin ko gadā.ī kā tumhārī

sab log unhīñ ke yahāñ maġhlūb rahe haiñ

dar-asl vahī log tumheñ paar mileñge

jo aag ke dariyā meñ abhī Duub rahe haiñ

ash.ār kī sūrat meñ bhalā kaise bayāñ ho

jalve dar-e-jānāñ ke bahut ḳhuub rahe haiñ

chhūTegā nahīñ sabr kā dāman ki hamāre

aslāf kabhī hazrat-e-yāqūb rahe haiñ

tum chāho agar baañT lo ham se ġham-e-hijrāñ

ham bhī to kisī ke kabhī mahbūb rahe haiñ

jin se bhī nazar pher lī rab ne mire 'afzal'

nazroñ meñ zamāne kī vo ma.ayūb rahe haiñ

jo log bhi dar se tere mansub rahe hain

firdaus ke wo phir kahan matlub rahe hain

hasil hai sharaf jin ko gadai ka tumhaari

sab log unhin ke yahan maghlub rahe hain

dar-asl wahi log tumhein par milenge

jo aag ke dariya mein abhi Dub rahe hain

ashaar ki surat mein bhala kaise bayan ho

jalwe dar-e-jaanan ke bahut KHub rahe hain

chhuTega nahin sabr ka daman ki hamare

aslaf kabhi hazrat-e-yaqub rahe hain

tum chaho agar banT lo hum se gham-e-hijran

hum bhi to kisi ke kabhi mahbub rahe hain

jin se bhi nazar pher li rab ne mere 'afzal'

nazron mein zamane ki wo mayub rahe hain