jo log ujale ka sab ko paigham sunane aate hain

jo log ujāle kā sab ko paiġhām sunāne aate haiñ

in shab-zādoñ kī nagrī meñ vo suulī par chaḌh jaate haiñ

ai mere ḳhudā kuchh tū hī batā ye daur-e-alam kab guzregā

is bastī meñ to musannif bhī sach kahne se ghabrāte haiñ

is duniyā meñ apnī ḳhātir ik lamha bhī ḳhushiyoñ kā nahīñ

fariyād ki bas ab ham hī haiñ jo rañj pe rañj uThāte haiñ

is shahr ke jitne baasī haiñ vo gūñge bahre haiñ varna

un par bhī khule ye ahl-e-qalam likhte haiñ yā chillāte haiñ

is daur ke baad jo daur nayā duniyā meñ aane vaalā hai

ham 'rājas' chup kī pastī meñ us daur ke naġhme gaate haiñ

jo log ujale ka sab ko paigham sunane aate hain

in shab-zadon ki nagri mein wo suli par chaDh jate hain

ai mere KHuda kuchh tu hi bata ye daur-e-alam kab guzrega

is basti mein to musannif bhi sach kahne se ghabraate hain

is duniya mein apni KHatir ek lamha bhi KHushiyon ka nahin

fariyaad ki bas ab hum hi hain jo ranj pe ranj uThate hain

is shahr ke jitne basi hain wo gunge bahre hain warna

un par bhi khule ye ahl-e-qalam likhte hain ya chillate hain

is daur ke baad jo daur naya duniya mein aane wala hai

hum 'rajas' chup ki pasti mein us daur ke naghme gate hain