jo log zaKHm ka marham talash karte hain

jo log zaḳhm kā marham talāsh karte haiñ

ham aise logoñ ko har-dam talāsh karte haiñ

ye kis ke ashk gire haiñ guloñ ke dāman par

ki log ashk meñ shabnam talāsh karte haiñ

tamām karte haiñ zardār kī ḳhabar-gīrī

magar ġharīboñ ko hī kam talāsh karte haiñ

surāġh miltā hai un ko ḳhudā kī qudrat kā

jo us ke rāzoñ ko paiham talāsh karte hai

yahāñ pe zulm tashaddud se aaj tang aa kar

sukūñ-pasand bhī ab ham talāsh karte haiñ

jo chāhte haiñ bhalā.ī vatan ke matvāle

vahī to amn kā parcham talāsh karte haiñ

kabhī to apne garebāñ meñ jhāñk kar dekheñ

jo aib ġhairoñ ke har-dam talāsh karte haiñ

jo log zaKHm ka marham talash karte hain

hum aise logon ko har-dam talash karte hain

ye kis ke ashk gire hain gulon ke daman par

ki log ashk mein shabnam talash karte hain

tamam karte hain zardar ki KHabar-giri

magar gharibon ko hi kam talash karte hain

suragh milta hai un ko KHuda ki qudrat ka

jo us ke raazon ko paiham talash karte hai

yahan pe zulm tashaddud se aaj tang aa kar

sukun-pasand bhi ab hum talash karte hain

jo chahte hain bhalai watan ke matwale

wahi to amn ka parcham talash karte hain

kabhi to apne gareban mein jhank kar dekhen

jo aib ghairon ke har-dam talash karte hain