jo mai-kade mein bahakte hain laDkhaDate hain

jo mai-kade meñ bahakte haiñ laḌkhaḌāte haiñ

mirā ḳhayāl hai vo tishnagī chhupāte haiñ

zarā sā vaqt ke sūraj ne ruḳh jo badlā hai

mire vajūd pe kuchh saa.e muskurāte haiñ

diloñ kī samt pe lafzoñ ke sañg mat pheñko

zarā sī Thes se ā.īne TuuT jaate haiñ

tilism-e-zāt kī phailī hai tīrgī itnī

ki vus.atoñ ke ujāle simaTte jaate haiñ

sitam-zarīfī-e-hālāt kā karishma hai

bhaTakne vaale mujhe rāste batāte haiñ

jinheñ 'hayāt' shu.ūr-e-hayāt hāsil hai

fareb dete nahīñ haiñ fareb khāte haiñ

jo mai-kade mein bahakte hain laDkhaDate hain

mera KHayal hai wo tishnagi chhupate hain

zara sa waqt ke suraj ne ruKH jo badla hai

mere wajud pe kuchh sae muskuraate hain

dilon ki samt pe lafzon ke sang mat phenko

zara si Thes se aaine TuT jate hain

tilism-e-zat ki phaili hai tirgi itni

ki wusaton ke ujale simaTte jate hain

sitam-zarifi-e-haalat ka karishma hai

bhaTakne wale mujhe raste batate hain

jinhen 'hayat' shuur-e-hayat hasil hai

fareb dete nahin hain fareb khate hain