jo mauj KHushbuon ki thi gulab se nikal gai

jo mauj ḳhushbuoñ kī thī gulāb se nikal ga.ī

maiñ muzmahil thī is qadar shabāb se nikal ga.ī

ye zindagī ye ruḳhsatī usī kī haiñ amānateñ

shikasta jism meñ tire azaab se nikal ga.ī

maiñ likh rahī thī dāstāñ tirā bhī naam aa gayā

kahānī apne aap hī kitāb se nikal ga.ī

vo lams baḌh rahā thā ab qarīb se qarīb-tar

so maiñ ne faisla kiyā habāb se nikal ga.ī

sharīk dauḌ meñ hue safar bhī aur qayām bhī

to raḳhsh-e-vaqt maiñ tirī rikāb se nikal ga.ī

savāl kā javāb bhī savāl hī se degā tū

jhamelā-sāz maiñ tire sarāb se nikal ga.ī

maiñ mubtalā-e-ārzū thī aarzū se jaag uThī

aur agle pal hī zindagī hisāb se nikal ga.ī

nirāsh chāñd tīrgī meñ ghul ke shānt ho gayā

'sahar' maiñ niiñd meñ chalī to ḳhvāb se nikal ga.ī

jo mauj KHushbuon ki thi gulab se nikal gai

main muzmahil thi is qadar shabab se nikal gai

ye zindagi ye ruKHsati usi ki hain amanaten

shikasta jism mein tere azab se nikal gai

main likh rahi thi dastan tera bhi nam aa gaya

kahani apne aap hi kitab se nikal gai

wo lams baDh raha tha ab qarib se qarib-tar

so main ne faisla kiya habab se nikal gai

sharik dauD mein hue safar bhi aur qayam bhi

to raKHsh-e-waqt main teri rikab se nikal gai

sawal ka jawab bhi sawal hi se dega tu

jhamela-saz main tere sarab se nikal gai

main mubtala-e-arzu thi aarzu se jag uThi

aur agle pal hi zindagi hisab se nikal gai

nirash chand tirgi mein ghul ke shant ho gaya

'sahar' main nind mein chali to KHwab se nikal gai