jo mere ham-asr ham-sohbat the so sab mar gae

jo mire ham-asr ham-sohbat the so sab mar ga.e

apnī apnī umar kā paimāna har yak bhar ga.e

pūchhte kyā ho gunāhoñ ke giraftāroñ kā haal

ḳhushk zāhid the so is jāgah se dāman tar ga.e

haath se sayyād ke sābit na chhūTā ek said

bāl-o-par rakhte the so be-bāl aur be-par ga.e

ye qimār-e-ishq hai ai bul-havas baazī na jaan

sar ga.e bahutoñ ke aur bahutoñ ke is meñ ghar ga.e

ham ne hastī aur adam kī aa ke kī hai ḳhuub sair

rasm o aa.iiñ dekh in logoñ kā az bas Dar ga.e

ek jo aayā use le god meñ dī ghar meñ jā

dūsre ko kaaḌh kar ghar se zamīñ meñ dhar ga.e

tum kaho apnī miyāñ 'hātim' ki ho kis fikr kī

aur jo aa.e jane jaisī banī so kar ga.e

jo mere ham-asr ham-sohbat the so sab mar gae

apni apni umar ka paimana har yak bhar gae

puchhte kya ho gunahon ke giraftaron ka haal

KHushk zahid the so is jagah se daman tar gae

hath se sayyaad ke sabit na chhuTa ek said

baal-o-par rakhte the so be-baal aur be-par gae

ye qimar-e-ishq hai ai bul-hawas bazi na jaan

sar gae bahuton ke aur bahuton ke is mein ghar gae

hum ne hasti aur adam ki aa ke ki hai KHub sair

rasm o aain dekh in logon ka az bas Dar gae

ek jo aaya use le god mein di ghar mein ja

dusre ko kaDh kar ghar se zamin mein dhar gae

tum kaho apni miyan 'hatim' ki ho kis fikr ki

aur jo aae jane jaisi bani so kar gae