jo motarif the mere shajra-e-nasab ke sab

jo mo'tarif the mire shajra-e-nasab ke sab

vo log ho ga.e ruḳhsat yahāñ se kab ke sab

fazā-e-nisbat-o-qurbat hai gard gard magar

samajh rahe haiñ mire dil kā haal sab ke sab

vo log jin kī himāyat meñ ḳhud se laḌtā rahā

vo log ho ga.e mere ḳhilāf ab ke sab

ravish meñ auroñ ke aslāf kī ravish na rahī

so qisse likkhe ga.e mere hī nasab ke sab

maiñ dūsroñ kī talab meñ bahāl hotā rahā

ġhulām hote rahe apnī hī talab ke sab

vo harf jis se uThā hai mirī navā kā ḳhamīr

haiñ muntazir usī ik harf-e-zer-e-lab ke sab

use ḳhabar thī ki maiñ ek shab kā mehmāñ huuñ

sau band vā kiye us ne qabā-e-shab ke sab

kisī rihā.ī kā ahvāl jānñe ke liye

sirhāne baiThe haiñ ḳhāmosh jāñ-ba-lab ke sab

charāġh aur qalam aañkh aur hairānī

ye isti.āre haiñ goyā mirī talab ke sab

ye ranjisheñ haiñ 'razī' aur hī ta.alluq se

ye silsile haiñ kisī aur hī tarab ke sab

jo mo'tarif the mere shajra-e-nasab ke sab

wo log ho gae ruKHsat yahan se kab ke sab

faza-e-nisbat-o-qurbat hai gard gard magar

samajh rahe hain mere dil ka haal sab ke sab

wo log jin ki himayat mein KHud se laDta raha

wo log ho gae mere KHilaf ab ke sab

rawish mein auron ke aslaf ki rawish na rahi

so qisse likkhe gae mere hi nasab ke sab

main dusron ki talab mein bahaal hota raha

ghulam hote rahe apni hi talab ke sab

wo harf jis se uTha hai meri nawa ka KHamir

hain muntazir usi ek harf-e-zer-e-lab ke sab

use KHabar thi ki main ek shab ka mehman hun

sau band wa kiye us ne qaba-e-shab ke sab

kisi rihai ka ahwal jaanne ke liye

sirhane baiThe hain KHamosh jaan-ba-lab ke sab

charagh aur qalam aankh aur hairani

ye istiare hain goya meri talab ke sab

ye ranjishen hain 'razi' aur hi talluq se

ye silsile hain kisi aur hi tarab ke sab