jo mujh pe qarz hai isko utar jaun main

jo mujh pe qarz hai is ko utaar jā.ūñ maiñ

ye aur baat hai jiito ki haar jā.ūñ maiñ

kabhī maiñ ḳhvāb meñ dekhūñ harī bharī fasleñ

kabhī ḳhayāl ke dariyā ke paar jā.ūñ maiñ

ik aur ma.arka-e-jabr-o-iḳhtiryār sahī

ik aur lamha-e-tāza guzār jā.ūñ maiñ

bikhar ga.e haiñ jo lamhe sameT luuñ un ko

bigaḌ ga.e haiñ jo naqshe sañvār jā.ūñ maiñ

kabhī to apnī talab meñ bhī is tarah niklūñ

ḳhud apne-āp se begāna-vār jā.ūñ maiñ

lahū kā rañg ki ātish kā rañg kuchh to ho

jo naqsh dab se ga.e haiñ ubhār jā.ūñ maiñ

mohabbatoñ ko na lag jaa.e nafratoñ kī nazar

ḳhudā kare ki har ik dukh sahār jā.ūñ maiñ

phir apnā aks maiñ apnī hī zaat meñ dekhūñ

jo ho sake to har ik dukh ke paar jā.ūñ maiñ

kisī ke rañg meñ ḳhud ko maiñ rañg luuñ 'at.har'

javāb aa.e na aa.e pukār jā.ūñ maiñ

jo mujh pe qarz hai is ko utar jaun main

ye aur baat hai jito ki haar jaun main

kabhi main KHwab mein dekhun hari bhari faslen

kabhi KHayal ke dariya ke par jaun main

ek aur marka-e-jabr-o-iKHtiryar sahi

ek aur lamha-e-taza guzar jaun main

bikhar gae hain jo lamhe sameT lun un ko

bigaD gae hain jo naqshe sanwar jaun main

kabhi to apni talab mein bhi is tarah niklun

KHud apne-ap se begana-war jaun main

lahu ka rang ki aatish ka rang kuchh to ho

jo naqsh dab se gae hain ubhaar jaun main

mohabbaton ko na lag jae nafraton ki nazar

KHuda kare ki har ek dukh sahaar jaun main

phir apna aks main apni hi zat mein dekhun

jo ho sake to har ek dukh ke par jaun main

kisi ke rang mein KHud ko main rang lun 'athar'

jawab aae na aae pukar jaun main