jo muntazar hai wahi inqilab main dunga

jo muntazar hai vahī inqilāb maiñ dūñgā

tumhāre paas qalam hai kitāb maiñ dūñgā

vo bhuul jā.egā apne sabhī savāloñ ko

javāb aisā use lā-javāb maiñ dūñgā

haqīqatoñ ke talāshī fareb-ḳhurda haiñ

samundaroñ meñ chhupā kar sarāb maiñ dūñgā

tamām 'umr jalegī mirī tarah vo bhī

Thahar ki ziist ko aisā 'azāb maiñ dūñgā

girī hai ḳhuun kī har buuñd mere dāman par

gunāh tū ne kiyā hai hisāb maiñ dūñgā

koī mujhe mire ḳhvāboñ se duur kar degā

kisī kī jāgtī āñkhoñ ko ḳhvāb maiñ dūñgā

bas ek ghūñT banā degā ‘ārif-o-sālik

tum apnā jaam uThāo sharāb maiñ dūñgā

vo apne haath meñ ik phuul le ke kahtā hai

ab aa.e iiñT ki patthar javāb maiñ dūñgā

jo muntazar hai wahi inqilab main dunga

tumhaare pas qalam hai kitab main dunga

wo bhul jaega apne sabhi sawalon ko

jawab aisa use la-jawab main dunga

haqiqaton ke talashi fareb-KHurda hain

samundaron mein chhupa kar sarab main dunga

tamam 'umr jalegi meri tarah wo bhi

Thahar ki zist ko aisa 'azab main dunga

giri hai KHun ki har bund mere daman par

gunah tu ne kiya hai hisab main dunga

koi mujhe mere KHwabon se dur kar dega

kisi ki jagti aankhon ko KHwab main dunga

bas ek ghunT bana dega ‘arif-o-salik

tum apna jam uThao sharab main dunga

wo apne hath mein ek phul le ke kahta hai

ab aae inT ki patthar jawab main dunga