jo mushkil thi use aasan banata ja raha tha

jo mushkil thī use āsāñ banātā jā rahā thā

ki jo hotā thā maiñ us ko bhulātā jā rahā thā

mujhe bhī apnī sachchā.ī pe zarra bhar na shak thā

zamāna bhī qasam apnī uThātā jā rahā thā

koī thā jo ki taktā jā rahā thā kārḳhāna

koī thā kārḳhāna jo chalātā jā rahā thā

badaltī jā rahī thī merī hālat lahza lahza

kisī ko jis tarah maiñ yaad aatā jā rahā thā

kahīñ andhī bhikāran laḌkhaḌātī jā rahī thī

jo paanī thā zad-e-jārūb khātā jā rahā thā

zuleḳhā-e-zamāna merī āñkhoñ meñ chhupī thī

ye mulk-e-misr thā aur suut kaatā jā rahā thā

jo paanī thā vo ik dahshat meñ baḌhtā aa rahā thā

jo dariyā thā kināroñ ko uḌātā jā rahā thā

zamānoñ ke mutābiq baab bañdhte jā rahe the

kanār-e-vaqt meñ fasleñ lagātā jā rahā thā

kahāñ andhe kuñveñ haiñ un ko bhartā jā rahā thā

kahāñ raste hī raste haiñ batātā jā rahā thā

jo mushkil thi use aasan banata ja raha tha

ki jo hota tha main us ko bhulata ja raha tha

mujhe bhi apni sachchai pe zarra bhar na shak tha

zamana bhi qasam apni uThata ja raha tha

koi tha jo ki takta ja raha tha karKHana

koi tha karKHana jo chalata ja raha tha

badalti ja rahi thi meri haalat lahza lahza

kisi ko jis tarah main yaad aata ja raha tha

kahin andhi bhikaran laDkhaDati ja rahi thi

jo pani tha zad-e-jarub khata ja raha tha

zuleKHa-e-zamana meri aankhon mein chhupi thi

ye mulk-e-misr tha aur sut kata ja raha tha

jo pani tha wo ek dahshat mein baDhta aa raha tha

jo dariya tha kinaron ko uData ja raha tha

zamanon ke mutabiq bab bandhte ja rahe the

kanar-e-waqt mein faslen lagata ja raha tha

kahan andhe kunwen hain un ko bharta ja raha tha

kahan raste hi raste hain batata ja raha tha