jo na-murad kucha-e-jaanan mein aa gae

jo nā-murād kūcha-e-jānāñ meñ aa ga.e

marne se pahle gor-e-ġharībāñ meñ aa ga.e

chhūte hī mere mūñchh kī tarah ukhaḌ ga.ī

bal lākhoñ terī zulf-e-pareshāñ meñ aa ga.e

likkhī haiñ vahshiyoñ ke muqaddar meñ do jagah

zindāñ se jab chhuTe to bayābāñ meñ aa ga.e

elān-e-dīd sunte hī do roz peshtar

āshiq hazāroñ kūcha-e-jānāñ meñ aa ga.e

ham pāgaloñ kā aur Thikānā kahīñ nahīñ

bastī meñ jab piTe to bayābāñ meñ aa ga.e

muddat se thī inheñ jo namak-pāshiyoñ kī chaah

zaḳhm-e-jigar uchhal ke namakdāñ meñ aa ga.e

vahshat meñ aa gayā hameñ biivī kā jab ḳhayāl

us ko bhī saath le ke bayābāñ meñ aa ga.e

piTvāyā ḳhuub hī unheñ darbāñ ke haath se

jo be-bulā.e mahfil-e-jānāñ meñ aa ga.e

aahā kā aur hū kā ajab shor mach gayā

jis vaqt 'būm' bazm-e-suḳhan-dāñ meñ aa ga.e

jo na-murad kucha-e-jaanan mein aa gae

marne se pahle gor-e-ghariban mein aa gae

chhute hi mere munchh ki tarah ukhaD gai

bal lakhon teri zulf-e-pareshan mein aa gae

likkhi hain wahshiyon ke muqaddar mein do jagah

zindan se jab chhuTe to bayaban mein aa gae

elan-e-did sunte hi do roz peshtar

aashiq hazaron kucha-e-jaanan mein aa gae

hum pagalon ka aur Thikana kahin nahin

basti mein jab piTe to bayaban mein aa gae

muddat se thi inhen jo namak-pashiyon ki chah

zaKHm-e-jigar uchhal ke namakdan mein aa gae

wahshat mein aa gaya hamein biwi ka jab KHayal

us ko bhi sath le ke bayaban mein aa gae

piTwaya KHub hi unhen darban ke hath se

jo be-bulae mahfil-e-jaanan mein aa gae

aaha ka aur hu ka ajab shor mach gaya

jis waqt 'bum' bazm-e-suKHan-dan mein aa gae