jo nahin jaanta hun KHalq-e-KHuda puchhti hai

jo nahīñ jāntā huuñ ḳhalq-e-ḳhudā pūchhtī hai

mujh se har moḌ pe ab merā patā pūchhtī hai

be-amāñ dekh ke TuuTe hue pattoñ kī tarah

le chalūñ tujh ko kidhar mujh se havā pūchhtī hai

mujh meñ vo kaun sī shai hai jo har ik pal mujh se

honā kab qaid-e-badan se hai rihā pūchhtī hai

dekh kar jis ko sabhī log haiñ ghabrā.e hue

ḳhairiyat merī vahī rāh-e-fanā pūchhtī hai

muntazir kab se mirī tishna-labī thī jis kī

vo ghaTā mujh se samundar kā pata pūchhtī hai

zarre zarre kī zabāñ par hai kahānī merī

mujh se ye duniyā mire baare meñ kyā pūchhtī hai

dasht-e-zulmat hai mujhe shahr-e-nigārāñ 'naushād'

hāl-e-dil mujh se sitāroñ kī ziyā pūchhtī hai

jo nahin jaanta hun KHalq-e-KHuda puchhti hai

mujh se har moD pe ab mera pata puchhti hai

be-aman dekh ke TuTe hue patton ki tarah

le chalun tujh ko kidhar mujh se hawa puchhti hai

mujh mein wo kaun si shai hai jo har ek pal mujh se

hona kab qaid-e-badan se hai riha puchhti hai

dekh kar jis ko sabhi log hain ghabrae hue

KHairiyat meri wahi rah-e-fana puchhti hai

muntazir kab se meri tishna-labi thi jis ki

wo ghaTa mujh se samundar ka pata puchhti hai

zarre zarre ki zaban par hai kahani meri

mujh se ye duniya mere bare mein kya puchhti hai

dasht-e-zulmat hai mujhe shahr-e-nigaran 'naushad'

haal-e-dil mujh se sitaron ki ziya puchhti hai