jo paDhne ke liye usko diya diya jae

jo paḌhne ke liye us ko diyā diyā jaa.e

to mere jism ko ik ḳhat banā diyā jaa.e

vo ruuh pyaas hai merī so chāhtā huuñ maiñ

badan haTā ke mujhe rāstā diyā jaa.e

vo laḌkī roz yahī kahtī rahtī hai mujh se

chalo charāġh jalā ke bujhā diyā jaa.e

hamīñ parinde ke har zaḳhm kā ḳhayāl rakheñ

hamīñ se le ke parinda uḌā diyā jaa.e

to is se pahle ki mujh ko bharam ho hañsne kā

tamāsha ḳhatm ho pardā girā diyā jaa.e

ye jism āñsuoñ se itnā bhar chukā hai dost

miTā ke ab mujhe dariyā banā diyā jaa.e

yahīñ chhuā thā mujhe chhoḌte hue us ne

yahāñ ke zaḳhm ko gahrā banā diyā jaa.e

jo paDhne ke liye us ko diya diya jae

to mere jism ko ek KHat bana diya jae

wo ruh pyas hai meri so chahta hun main

badan haTa ke mujhe rasta diya jae

wo laDki roz yahi kahti rahti hai mujh se

chalo charagh jala ke bujha diya jae

hamin parinde ke har zaKHm ka KHayal rakhen

hamin se le ke parinda uDa diya jae

to is se pahle ki mujh ko bharam ho hansne ka

tamasha KHatm ho parda gira diya jae

ye jism aansuon se itna bhar chuka hai dost

miTa ke ab mujhe dariya bana diya jae

yahin chhua tha mujhe chhoDte hue us ne

yahan ke zaKHm ko gahra bana diya jae