jo pilae wo rahe yarab mai-o-saghar se KHush

jo pilā.e vo rahe yārab mai-o-sāġhar se ḳhush

ḳhush rahe pīr-e-muġhāñ jaate haiñ us ke dar se ḳhush

sañg-e-ḳhūñ-ālūda ko samjhe haiñ ye gulshan kā phuul

toḌ kar sar tere dīvāne haiñ kyā patthar se ḳhush

us galī ke rahne vaale bhī maze ke log haiñ

fitna-e-mahshar se ḳhush hañgāma-e-mahshar se ḳhush

yuuñ gale se kyuuñ lagātā saḳht-jānoñ ko koī

ham gale mil kar hue kyā kyā tire ḳhanjar se ḳhush

ḳhum ke ḳhum bhar bhar ke jaa.eñ kam na ho mai būñd-bar

zāhid-o-ham haiñ tumhāre chashma-e-kausar se ḳhush

ḳhuun paanī ek merā ho gayā un ke liye

apne zaḳhm-e-dil se ḳhush hoñ apne chashm-e-tar se ḳhush

dil meñ ghar kartī hai vo kāfir mizha kāfir nigah

maiñ tire paikāñ se ḳhush huuñ maiñ tire nashtar se ḳhush

ḳhāna bāġh-e-ġhair meñ the yā khule maidān meñ

vo kahīñ se aa.e hoñ aa.e haiñ kuchh bāhar se ḳhush

mai-kade meñ aa ke piite haiñ pilāte haiñ 'riyāz'

kah rahī hai vaz.a un kī haiñ ye apne ghar se ḳhush

jo pilae wo rahe yarab mai-o-saghar se KHush

KHush rahe pir-e-mughan jate hain us ke dar se KHush

sang-e-KHun-aluda ko samjhe hain ye gulshan ka phul

toD kar sar tere diwane hain kya patthar se KHush

us gali ke rahne wale bhi maze ke log hain

fitna-e-mahshar se KHush hangama-e-mahshar se KHush

yun gale se kyun lagata saKHt-jaanon ko koi

hum gale mil kar hue kya kya tere KHanjar se KHush

KHum ke KHum bhar bhar ke jaen kam na ho mai bund-bar

zahid-o-ham hain tumhaare chashma-e-kausar se KHush

KHun pani ek mera ho gaya un ke liye

apne zaKHm-e-dil se KHush hon apne chashm-e-tar se KHush

dil mein ghar karti hai wo kafir mizha kafir nigah

main tere paikan se KHush hun main tere nashtar se KHush

KHana bagh-e-ghair mein the ya khule maidan mein

wo kahin se aae hon aae hain kuchh bahar se KHush

mai-kade mein aa ke pite hain pilate hain 'riyaz'

kah rahi hai waza un ki hain ye apne ghar se KHush