jo qaid apni zat ki tanhaiyon mein tha

jo qaid apnī zaat kī tanhā.iyoñ meñ thā

vo bhī samajh rahā thā ki gahrā.iyoñ meñ thā

ik mehr-e-nīm-roz thā ik chaudhvīñ kā chāñd

kis darja iḳhtilāf mire bhā.iyoñ meñ thā

is kā nahīñ malāl tamāsha bane rahe

ġham to ye hai ki vo bhī tamāshā.iyoñ meñ thā

ḳhud-matlabī ke raag ne be-lutf kar diyā

varna maza ḳhulūs kī shahnā.iyoñ meñ thā

maiñ yuuñ sirāt-e-karb se hañstā guzar gayā

terā ḳhayāl hausla-afzāiyoñ meñ thā

ab kyā kareñ jo dil pe kisī ke lagā ho zaḳhm

nashtar hamārī bātoñ kī sachchā.iyoñ meñ thā

hālāñki ḳhud 'shafīq' bikhartā chalā gayā

masrūf phir bhī anjuman-ārā.iyoñ meñ thā

jo qaid apni zat ki tanhaiyon mein tha

wo bhi samajh raha tha ki gahraiyon mein tha

ek mehr-e-nim-roz tha ek chaudhwin ka chand

kis darja iKHtilaf mere bhaiyon mein tha

is ka nahin malal tamasha bane rahe

gham to ye hai ki wo bhi tamashaiyon mein tha

KHud-matlabi ke rag ne be-lutf kar diya

warna maza KHulus ki shahnaiyon mein tha

main yun siraat-e-karb se hansta guzar gaya

tera KHayal hausla-afzaiyon mein tha

ab kya karen jo dil pe kisi ke laga ho zaKHm

nashtar hamari baaton ki sachchaiyon mein tha

haalanki KHud 'shafiq' bikharta chala gaya

masruf phir bhi anjuman-araiyon mein tha