jo raat bhar tere KHwabon mein ghumta hoga

jo raat bhar tire ḳhvāboñ meñ ghūmtā hogā

vo maiñ nahīñ mirī sūrat kā dūsrā hogā

haqīqatoñ kā mujhe tajraba nahīñ maiñ chalā

koī sarāb mirī raah dekhtā hogā

hamārī qabr kā koī nishāñ nahīñ phir bhī

hamārī qabr par ik shaḳhs ro rahā hogā

junūñ bane to sharāra vafā bane to gulāb

vo dil ke baare meñ itnā to jāntā hogā

tumhāre haath tumhīñ ko halāk kar deñge

hamāre baa'd tumhārā bhī faisla hogā

har ek lamha hai masrūf phir bhī be-maqsad

hamāre ahd kā anjām jaane kyā hogā

jo raat bhar tere KHwabon mein ghumta hoga

wo main nahin meri surat ka dusra hoga

haqiqaton ka mujhe tajraba nahin main chala

koi sarab meri rah dekhta hoga

hamari qabr ka koi nishan nahin phir bhi

hamari qabr par ek shaKHs ro raha hoga

junun bane to sharara wafa bane to gulab

wo dil ke bare mein itna to jaanta hoga

tumhaare hath tumhin ko halak kar denge

hamare ba'd tumhaara bhi faisla hoga

har ek lamha hai masruf phir bhi be-maqsad

hamare ahd ka anjam jaane kya hoga