jo rang-ha-e-ruKH-e-dostan samajhte the

jo rang-hā-e-ruḳh-e-dostāñ samajhte the

vo ham-nafas bhī mirā dukh kahāñ samajhte the

mohabbatoñ meñ kināre nahīñ milā karte

magar ye Dūbne vaale kahāñ samajhte the

khulā ki chādar-e-shab meñ bhī vus'ateñ haiñ ka.ī

zarā sī dhuup ko ham āsmāñ samajhte the

ḳhizāñ ke ‘ahd-e-asīrī se peshtar taa.ir

chaman meñ mausam-e-gul kī zabāñ samajhte the

unheñ bhī dahr kī farzāngī na raas aa.ī

jo kār-e-'ishq ke sūd-o-ziyāñ samajhte the

kisī kā qurb qayāmat se kam nahīñ thā 'sa'īd'

faqat firāq ko ham imtihāñ samajhte the

jo rang-ha-e-ruKH-e-dostan samajhte the

wo ham-nafas bhi mera dukh kahan samajhte the

mohabbaton mein kinare nahin mila karte

magar ye Dubne wale kahan samajhte the

khula ki chadar-e-shab mein bhi wus'aten hain kai

zara si dhup ko hum aasman samajhte the

KHizan ke ‘ahd-e-asiri se peshtar tair

chaman mein mausam-e-gul ki zaban samajhte the

unhen bhi dahr ki farzangi na ras aai

jo kar-e-'ishq ke sud-o-ziyan samajhte the

kisi ka qurb qayamat se kam nahin tha 'sa'id'

faqat firaq ko hum imtihan samajhte the