jo ranjishen thin unhen barqarar rahne diya

jo ranjisheñ thiiñ unheñ barqarār rahne diyā

gale mile bhī to dil meñ ġhubār rahne diyā

na.e makān kī tā'mīr kar to lī ham ne

purānī chhat ko magar barqarār rahne diyā

na koī ḳhvāb dikhāyā na ġham diyā us ko

bas us kī āñkhoñ meñ ik intizār rahne diyā

use bhulā bhī diyā yaad bhī rakhā us ko

nasha utaar diyā aur ḳhumār rahne diyā

galī ke moḌ se āvāz de ke lauT aa.e

tamām raat use be-qarār rahne diyā

vo ham ko toḌ ke jaatā to bhuul jaate use

nikalne vaale ne lekin hisār rahne diyā

na jaane kyā thā ki us se fareb khā kar bhī

usī ke haath meñ sab iḳhtiyār rahne diyā

ye sard rut bhī hameñ ḳhud ko tāpte guzrī

ġhazal ko ham ne magar sāya-dār rahne diyā

baḌā gumān thā us ko hamārī chāhat kā

'shakīl' ham ne bhī us kā ḳhumār rahne diyā

jo ranjishen thin unhen barqarar rahne diya

gale mile bhi to dil mein ghubar rahne diya

nae makan ki ta'mir kar to li hum ne

purani chhat ko magar barqarar rahne diya

na koi KHwab dikhaya na gham diya us ko

bas us ki aankhon mein ek intizar rahne diya

use bhula bhi diya yaad bhi rakha us ko

nasha utar diya aur KHumar rahne diya

gali ke moD se aawaz de ke lauT aae

tamam raat use be-qarar rahne diya

wo hum ko toD ke jata to bhul jate use

nikalne wale ne lekin hisar rahne diya

na jaane kya tha ki us se fareb kha kar bhi

usi ke hath mein sab iKHtiyar rahne diya

ye sard rut bhi hamein KHud ko tapte guzri

ghazal ko hum ne magar saya-dar rahne diya

baDa guman tha us ko hamari chahat ka

'shakil' hum ne bhi us ka KHumar rahne diya