جو رنجشیں تھیں انہیں برقرار رہنے دیا

جو رنجشیں تھیں انہیں برقرار رہنے دیا

گلے ملے بھی تو دل میں غبار رہنے دیا

نئے مکان کی تعمیر کر تو لی ہم نے

پرانی چھت کو مگر برقرار رہنے دیا

نہ کوئی خواب دکھایا نہ غم دیا اس کو

بس اس کی آنکھوں میں اک انتظار رہنے دیا

اسے بھلا بھی دیا یاد بھی رکھا اس کو

نشہ اتار دیا اور خمار رہنے دیا

گلی کے موڑ سے آواز دے کے لوٹ آئے

تمام رات اسے بے قرار رہنے دیا

وہ ہم کو توڑ کے جاتا تو بھول جاتے اسے

نکلنے والے نے لیکن حصار رہنے دیا

نہ جانے کیا تھا کہ اس سے فریب کھا کر بھی

اسی کے ہاتھ میں سب اختیار رہنے دیا

یہ سرد رت بھی ہمیں خود کو تاپتے گزری

غزل کو ہم نے مگر سایہ دار رہنے دیا

بڑا گمان تھا اس کو ہماری چاہت کا

شکیلؔ ہم نے بھی اس کا خمار رہنے دیا