jo sajta hai kalai par koi zewar hasinon ki

jo sajtā hai kalā.ī par koī zevar hasīnoñ kī

tabhī baḌhtī haiñ qīmat jauharī tere nagīnoñ kī

uThā detī hai dīvāreñ diloñ ke biich ye aksar

zarūrat kyuuñ ho phir ham ko bhalā aisī zamīnoñ kī

usī meñ chhed karte haiñ ki jis thālī meñ khāte haiñ

badal saktī nahīñ aadat kabhī aisī kamīnoñ kī

bharā hai laakh phūloñ se mire ghar kā hasīñ āñgan

yahī hai merī daulat mujh ko kyā chāhat dafīnoñ kī

kabhī mehnat mashaqqat se kamā loge bahut daulat

magar badloge tum kaise lakīroñ ko jabīnoñ kī

uThā kar ek baar un ko lagā lo apne hoñToñ se

chueñgī āsmāñ ko qīmateñ un ābgīnoñ kī

jo nukta-chīñ haiñ rahnā hai hamesha nukta-chīñ un ko

badal saktī nahīñ fitrat kabhī bhī nukta-chīnoñ kī

jo sajta hai kalai par koi zewar hasinon ki

tabhi baDhti hain qimat jauhari tere naginon ki

uTha deti hai diwaren dilon ke bich ye aksar

zarurat kyun ho phir hum ko bhala aisi zaminon ki

usi mein chhed karte hain ki jis thaali mein khate hain

badal sakti nahin aadat kabhi aisi kaminon ki

bhara hai lakh phulon se mere ghar ka hasin aangan

yahi hai meri daulat mujh ko kya chahat dafinon ki

kabhi mehnat mashaqqat se kama loge bahut daulat

magar badloge tum kaise lakiron ko jabinon ki

uTha kar ek bar un ko laga lo apne honTon se

chuengi aasman ko qimaten un aabginon ki

jo nukta-chin hain rahna hai hamesha nukta-chin un ko

badal sakti nahin fitrat kabhi bhi nukta-chinon ki