jo shahon ko nahin hasil wo jauhar pas rakhta hai

jo shāhoñ ko nahīñ hāsil vo jauhar paas rakhtā hai

sukūn-e-qalb har shahzāda-e-iflās rakhtā hai

vo apnī zaat ko mahv-e-qunūt-o-yās rakhtā hai

samundar ḳhud ko kahtā hai laboñ par pyaas rakhtā hai

haiñ taḳht-o-tāj kī ḳhātir dayār-e-kufr ke sajde

magar momin faqat allāh par vishvās rakhtā hai

musalsal chīḳhtā rahtā hai ham ye jang jīteñge

jo har lamha shikast-e-fāsh kā ehsās rakhtā hai

shurūr-e-nafs aur ḳhannās phir bhī ġhālib aate haiñ

agarche vo laboñ par sūra-e-vannās rakhtā hai

tavajjoh ko vahī markaz vo taskīn-e-nigāh-o-dil

vo saada shaḳhs jo kirdār kī bū-bās rakhtā hai

jiyo to is tarah jaise vatan kī tum zarūrat ho

vagarna be-hunar se kaun 'hanafī' aas rakhtā hai

jo shahon ko nahin hasil wo jauhar pas rakhta hai

sukun-e-qalb har shahzada-e-iflas rakhta hai

wo apni zat ko mahw-e-qunut-o-yas rakhta hai

samundar KHud ko kahta hai labon par pyas rakhta hai

hain taKHt-o-taj ki KHatir dayar-e-kufr ke sajde

magar momin faqat allah par wishwas rakhta hai

musalsal chiKHta rahta hai hum ye jang jitenge

jo har lamha shikast-e-fash ka ehsas rakhta hai

shurur-e-nafs aur KHannas phir bhi ghaalib aate hain

agarche wo labon par sura-e-wannas rakhta hai

tawajjoh ko wahi markaz wo taskin-e-nigah-o-dil

wo sada shaKHs jo kirdar ki bu-bas rakhta hai

jiyo to is tarah jaise watan ki tum zarurat ho

wagarna be-hunar se kaun 'hanafi' aas rakhta hai