jo shaKHs akela hi bojhal safar se aaya tha

jo shaḳhs akelā hī bojhal safar se aayā thā

kisī ne pūchhā vo luT kar kidhar se aayā thā

ye raushnī to mirī vahshateñ baḌhā ga.ī aur

maiñ raushnī meñ añdheroñ ke Dar se aayā thā

jise kahīñ bhī na Tikne diyā havāoñ ne

vo barg kuchh bhī thā kaT kar shajar se aayā thā

jo sañg itnī harārat lahū ko baḳhsh gayā

mujhe navāzne mere hī ghar se aayā thā

naved-e-āmād-e-chārā-garāñ ko jug biite

qarār dil ko zarā is ḳhabar se aayā thā

ham itne aa.e jhulas kar kisī ne ye na kahā

tumhārā qāfila kis rah-guzar se aayā thā

milā jo kuuze ko āñchoñ meñ tap ke rañg-e-sabāt

vo pahle sholagi-e-kūzā-gar se aayā thā

ajiib dhun kā musāfir thā kuuch kar gayā aaj

ġharīb ghar kī hī chāhat meñ ghar se aayā thā

jo shaKHs akela hi bojhal safar se aaya tha

kisi ne puchha wo luT kar kidhar se aaya tha

ye raushni to meri wahshaten baDha gai aur

main raushni mein andheron ke Dar se aaya tha

jise kahin bhi na Tikne diya hawaon ne

wo barg kuchh bhi tha kaT kar shajar se aaya tha

jo sang itni hararat lahu ko baKHsh gaya

mujhe nawazne mere hi ghar se aaya tha

nawed-e-amad-e-chaara-garan ko jug bite

qarar dil ko zara is KHabar se aaya tha

hum itne aae jhulas kar kisi ne ye na kaha

tumhaara qafila kis rah-guzar se aaya tha

mila jo kuze ko aanchon mein tap ke rang-e-sabaat

wo pahle sholagi-e-kuza-gar se aaya tha

ajib dhun ka musafir tha kuch kar gaya aaj

gharib ghar ki hi chahat mein ghar se aaya tha