jo shaKHs mujh mein baqi hai wo ‘madhwi’ nahin

jo shaḳhs mujh meñ baaqī hai vo ‘mādhvī’ nahīñ

kuchh saal ho chuke haiñ ḳhabar aaj kī nahīñ

tum se ḳhafā nahīñ huuñ ye aadat hī hai merī

jab tak bahut zarūrī na ho boltī nahīñ

kah to rahe haiñ baiThiye kuchh der paas meñ

aur ye bhī kah rahe haiñ jagah aap kī nahīñ

sāda-mizāj dil pe chaḌhā.e tamām rang

phir ye shikāyateñ bhī ki vo sādgī nahīñ

kyoñ rāzdār kah ke use āzmā.eñ ham

so apne dil kī baat use bhī kahī nahīñ

ab bhī nazar bachāne kī pur-zor koshisheñ

ya.anī abhī maiñ us ke liye ajnabī nahīñ

jo shaKHs mujh mein baqi hai wo ‘madhwi’ nahin

kuchh sal ho chuke hain KHabar aaj ki nahin

tum se KHafa nahin hun ye aadat hi hai meri

jab tak bahut zaruri na ho bolti nahin

kah to rahe hain baiThiye kuchh der pas mein

aur ye bhi kah rahe hain jagah aap ki nahin

sada-mizaj dil pe chaDhae tamam rang

phir ye shikayaten bhi ki wo sadgi nahin

kyon raazdar kah ke use aazmaen hum

so apne dil ki baat use bhi kahi nahin

ab bhi nazar bachane ki pur-zor koshishen

yani abhi main us ke liye ajnabi nahin