jo shikwa karte hain hashami se kam-numai ka

jo shikva karte haiñ 'hashamī' se kam-numā.ī kā

unheñ bhī Dar hai zamāne kī kaj-adā.ī kā

phire haiñ dhuup meñ saa.e ko saath saath liye

ki khul na jaa.e bharam apnī be-navā.ī kā

magar kuchh aur hai yaarī kī baat shauq se tum

lagāo chehroñ pe ilzām āshnā.ī kā

araq araq the nadāmat kī aañch se ḳhud hī

gila kareñ bhī to kyā terī bevafā.ī kā

kuchh is adā se satā.e ga.e haiñ ham ab ke

har ek saañs meñ andāz hai duhā.ī kā

chalā to huuñ tire hamrāh kuchh qadam hī sahī

jo de to kyuuñ mujhe ta.ana shikasta-pā.ī kā

jo apne dar pe sadā dī to kyā milā pyāre

yahī ki naam Dubo aa.e ham gadā.ī kā

nikal paḌe ho use DhūñDne magar 'hashamī'

ye rāsta hai mirī jaan nā-rasā.ī kā

jo shikwa karte hain 'hashami' se kam-numai ka

unhen bhi Dar hai zamane ki kaj-adai ka

phire hain dhup mein sae ko sath sath liye

ki khul na jae bharam apni be-nawai ka

magar kuchh aur hai yari ki baat shauq se tum

lagao chehron pe ilzam aashnai ka

araq araq the nadamat ki aanch se KHud hi

gila karen bhi to kya teri bewafai ka

kuchh is ada se satae gae hain hum ab ke

har ek sans mein andaz hai duhai ka

chala to hun tere hamrah kuchh qadam hi sahi

jo de to kyun mujhe tana shikasta-pai ka

jo apne dar pe sada di to kya mila pyare

yahi ki nam Dubo aae hum gadai ka

nikal paDe ho use DhunDne magar 'hashami'

ye rasta hai meri jaan na-rasai ka