jo shor karte rahe shor hi mein Dub gae

jo shor karte rahe shor hī meñ Duub ga.e

sab apne zauq-e-junūñ kī nadī meñ Duub ga.e

ajiib sāneha guzrā hai nukta-dānoñ par

jis āgahī se vo ubhre usī meñ Duub ga.e

rafīq ban ke jab aaya nayā ḳhayāl koī

ḳhushī kuchh itnī milī ham ḳhushī meñ Duub ga.e

kisī taraf se bhī koī sadā nahīñ aa.ī

parinde shaam hī se ḳhāmushī meñ Duub ga.e

ab apne zarf ke tābūt par haiñ nauha-kunāñ

jo log apnī hī ḳhush-āgahī meñ Duub ga.e

zabān-o-lafz ke ab tak hazāroñ jādūgar

ḳhud apne fan kī añdherī galī meñ Duub ga.e

ubhar sake na jo hālāt ke thapeḌoñ se

vo rafta rafta ġham-e-zindagī meñ Duub ga.e

jo shor karte rahe shor hi mein Dub gae

sab apne zauq-e-junun ki nadi mein Dub gae

ajib saneha guzra hai nukta-danon par

jis aagahi se wo ubhre usi mein Dub gae

rafiq ban ke jab aaya naya KHayal koi

KHushi kuchh itni mili hum KHushi mein Dub gae

kisi taraf se bhi koi sada nahin aai

parinde sham hi se KHamushi mein Dub gae

ab apne zarf ke tabut par hain nauha-kunan

jo log apni hi KHush-agahi mein Dub gae

zaban-o-lafz ke ab tak hazaron jadugar

KHud apne fan ki andheri gali mein Dub gae

ubhar sake na jo haalat ke thapeDon se

wo rafta rafta gham-e-zindagi mein Dub gae