jo sine par teri zulfon ka abr aata to behtar tha

jo siine par terī zulfoñ kā abr aatā to behtar thā

jilā-e-qalb hotī dil sañbhal jaatā to behtar thā

kisī lailā se kam jaanā nahīñ tujh ko kabhī ham ne

tujhe bhī ham meñ koī qais dikh jaatā to behtar thā

nahīñ paanī mayassar to in āñkhoñ ko to dhokā ho

sarāb-e-reg se ik pal ko chain aatā to behtar thā

ye kaise dost maiñ ne āstīnoñ meñ basā.e haiñ

na hotā in se gar merā koī naata to behtar thā

vo ik jo gosha-e-dil DhūñDhtā huuñ maiñ ye dil le ke

usī ko DhūñDhne meñ ye bhī kho jaatā to behtar thā

javāñ beTā ki jis se baap kuchh kahtā hai Dar Dar ke

vo apne baap se thoḌā sā Dar jaatā to behtar thā

siyāsat tere dāman par ye itne daaġh kaise haiñ

kisī ke ḳhuun se ye bhī chamak jaatā to behtar thā

jo sine par teri zulfon ka abr aata to behtar tha

jila-e-qalb hoti dil sanbhal jata to behtar tha

kisi laila se kam jaana nahin tujh ko kabhi hum ne

tujhe bhi hum mein koi qais dikh jata to behtar tha

nahin pani mayassar to in aankhon ko to dhoka ho

sarab-e-reg se ek pal ko chain aata to behtar tha

ye kaise dost main ne aastinon mein basae hain

na hota in se gar mera koi nata to behtar tha

wo ek jo gosha-e-dil DhunDhta hun main ye dil le ke

usi ko DhunDhne mein ye bhi kho jata to behtar tha

jawan beTa ki jis se bap kuchh kahta hai Dar Dar ke

wo apne bap se thoDa sa Dar jata to behtar tha

siyasat tere daman par ye itne dagh kaise hain

kisi ke KHun se ye bhi chamak jata to behtar tha