jo sochte rahe wo kar guzarna chahte hain

jo sochte rahe vo kar guzarnā chāhte haiñ

ki ḳhvāb āñkhoñ se ghar meñ utarnā chāhte haiñ

sunā.ī detī hai har samt se naved-e-baqā

amīr-e-shahr ki jab log marnā chāhte haiñ

parinda ḳhauf-zada haiñ ki pālne vaale

paroñ ke saath zabāñ bhī katarnā chāhte haiñ

zamīñ kī aarzū sairāb ho kisī sūrat

samundaroñ meñ jazīre ubharnā chāhte haiñ

ubharne lagtī hai ik chīḳh us kināre par

ham us kināre pe jab bhī utarnā chāhte haiñ

adam-subūt-o-shahādat meñ hoñ barī to 'vaqār'

ham apne jurm kā iqbāl karnā chāhte haiñ

jo sochte rahe wo kar guzarna chahte hain

ki KHwab aankhon se ghar mein utarna chahte hain

sunai deti hai har samt se nawed-e-baqa

amir-e-shahr ki jab log marna chahte hain

parinda KHauf-zada hain ki palne wale

paron ke sath zaban bhi katarna chahte hain

zamin ki aarzu sairab ho kisi surat

samundaron mein jazire ubharna chahte hain

ubharne lagti hai ek chiKH us kinare par

hum us kinare pe jab bhi utarna chahte hain

adam-subut-o-shahadat mein hon bari to 'waqar'

hum apne jurm ka iqbaal karna chahte hain