jo sun sako to suno tum fughan charaghon ki

jo sun sako to suno tum fuġhāñ charāġhoñ kī

laveñ churā lī ga.ī haiñ yahāñ charāġhoñ kī

maiñ ḳhāl-o-ḳhad ke bikharne se bachnā chāhtā huuñ

so mujh ko chāhiye kuchh din amaañ charāġhoñ kī

jise bhī chāhiye vo aa.e raushnī le jaa.e

sajā.e baiThe haiñ ham to dukāñ charāġhoñ kī

yahīñ kahīñ pe mohabbat kā hai paḌāv miyāñ

sunā.ī dene lagī hai azaañ charāġhoñ kī

sahar se kahiye ki Thahre aur intizār kare

maiñ sun rahā huuñ abhī dāstāñ charāġhoñ kī

jo sun sako to suno tum fughan charaghon ki

lawen chura li gai hain yahan charaghon ki

main KHal-o-KHad ke bikharne se bachna chahta hun

so mujh ko chahiye kuchh din aman charaghon ki

jise bhi chahiye wo aae raushni le jae

sajae baiThe hain hum to dukan charaghon ki

yahin kahin pe mohabbat ka hai paDaw miyan

sunai dene lagi hai azan charaghon ki

sahar se kahiye ki Thahre aur intizar kare

main sun raha hun abhi dastan charaghon ki