jo surat ishq ki paida na karta

jo sūrat ishq kī paidā na kartā

to koī husn kī puujā na kartā

mohabbat kā kabhī saudā na kartā

zamāna aap ko rusvā na kartā

firāq-e-dīd meñ taḌpā na kartā

to dil duniyā-e-ġham paidā na kartā

butoñ ke ishq meñ rusvā na kartā

ḳhudā kuchh aur kartā yā na kartā

agar ehsān ko bhūlā na kartā

bashar duniyā kā muñh kaalā na kartā

tumhāre āriz-e-rañgīñ ke hote

hasīnoñ kī koī parvā na kartā

surūr-e-dil agar hotā haqīqī

qayāmat nit-na.ī barpā na kartā

bil-āḳhir ham ne tum par jaan de dī

ye aalam thā ki martā kyā na kartā

agar saaqī kī āñkhoñ meñ khaTaktā

to bāda-ḳhvār kī parvā na kartā

jo hotā hosh mujh ko be-ḳhudī meñ

vafā ke raaz ko ifshā na kartā

ġhanī rahtā na dil jo āshiqī se

to shāyad husn ko tolā na kartā

udhar tum be-ruḳhī par 'shād' rahte

idhar maiñ dil kabhī mailā na kartā

jo surat ishq ki paida na karta

to koi husn ki puja na karta

mohabbat ka kabhi sauda na karta

zamana aap ko ruswa na karta

firaq-e-did mein taDpa na karta

to dil duniya-e-gham paida na karta

buton ke ishq mein ruswa na karta

KHuda kuchh aur karta ya na karta

agar ehsan ko bhula na karta

bashar duniya ka munh kala na karta

tumhaare aariz-e-rangin ke hote

hasinon ki koi parwa na karta

surur-e-dil agar hota haqiqi

qayamat nit-nai barpa na karta

bil-aKHir hum ne tum par jaan de di

ye aalam tha ki marta kya na karta

agar saqi ki aankhon mein khaTakta

to baada-KHwar ki parwa na karta

jo hota hosh mujh ko be-KHudi mein

wafa ke raaz ko ifsha na karta

ghani rahta na dil jo aashiqi se

to shayad husn ko tola na karta

udhar tum be-ruKHi par 'shad' rahte

idhar main dil kabhi maila na karta