jo tab-e-did mili bhi to kya dikhai diya

jo tāb-e-dīd milī bhī to kyā dikhā.ī diyā

diloñ ke biich ajab fāsla dikhā.ī diyā

sahar kā niklā huā maiñ jo shaam ko lauTā

to mere ghar meñ koī dūsrā dikhā.ī diyā

ḳhalā meñ bas ga.e sab log ek ik kar ke

zamīñ pe jaane ye kyā hādisa dikhā.ī diyā

uḌāte jaate ho ḳhud ko ye kis taraf yaaro

safar meñ kyā koī rasta nayā dikhā.ī diyā

na raas aayā mujhe merī qurbatoñ kā safar

mirā ḳhayāl bhī mujh se judā dikhā.ī diyā

na baaḌh aa.ī na tūfān hī uThe imsāl

samundaroñ kā bharam TūTtā dikhā.ī diyā

tirī nigāh kī gahrā.iyoñ meñ dekhā to

mirā vajūd pighaltā huā dikhā.ī diyā

jahāñ pe saañs bhī lenā thā ek jurm 'zafar'

vahāñ bhī merā lahū boltā dikhā.ī diyā

jo tab-e-did mili bhi to kya dikhai diya

dilon ke bich ajab fasla dikhai diya

sahar ka nikla hua main jo sham ko lauTa

to mere ghar mein koi dusra dikhai diya

KHala mein bas gae sab log ek ek kar ke

zamin pe jaane ye kya hadisa dikhai diya

uDate jate ho KHud ko ye kis taraf yaro

safar mein kya koi rasta naya dikhai diya

na ras aaya mujhe meri qurbaton ka safar

mera KHayal bhi mujh se juda dikhai diya

na baDh aai na tufan hi uThe imsal

samundaron ka bharam TuTta dikhai diya

teri nigah ki gahraiyon mein dekha to

mera wajud pighalta hua dikhai diya

jahan pe sans bhi lena tha ek jurm 'zafar'

wahan bhi mera lahu bolta dikhai diya