jo teri rahguzar mein chubha tha Khaar mujhe

jo terī rāhguzar meñ chubhā thā ḳhaar mujhe

safar kī yaad dilātā hai baar baar mujhe

vo ḳhush-adā hai bahut log mujh se kahte haiñ

magar ye baat guzartī hai nāgavār mujhe

tamām-umr guzar jaa.e tujh tak aane meñ

na itnī duur se ai zindagī pukār mujhe

zamāna biit gayā mahv-e-raqs chaak pe huuñ

koī bhī shakl ho ai kūza-gar utaar mujhe

maiñ shauq-e-dīd liye aa gayā thā kūche meñ

ki chhoḌtā hī nahīñ ab tirā dayār mujhe

maiñ apne kū-e-tamannā meñ muntazir hī rahā

talāsh kartī rahī dasht meñ bahār mujhe

jafā ho yā ki vafā maiñ asīr-e-dard rahā

kisī bhī taur na aayā kabhī qarār mujhe

jab us ne toḌ diyā rishta-e-vafā 'tāriq'

to phir ye kis liye us kā hai intizār mujhe

jo teri rahguzar mein chubha tha KHar mujhe

safar ki yaad dilata hai bar bar mujhe

wo KHush-ada hai bahut log mujh se kahte hain

magar ye baat guzarti hai nagawar mujhe

tamam-umr guzar jae tujh tak aane mein

na itni dur se ai zindagi pukar mujhe

zamana bit gaya mahw-e-raqs chaak pe hun

koi bhi shakl ho ai kuza-gar utar mujhe

main shauq-e-did liye aa gaya tha kuche mein

ki chhoDta hi nahin ab tera dayar mujhe

main apne ku-e-tamanna mein muntazir hi raha

talash karti rahi dasht mein bahaar mujhe

jafa ho ya ki wafa main asir-e-dard raha

kisi bhi taur na aaya kabhi qarar mujhe

jab us ne toD diya rishta-e-wafa 'tariq'

to phir ye kis liye us ka hai intizar mujhe