jo teri yaadon se is dil ka aaftab mile

jo terī yādoñ se is dil kā āftāb mile

to merī āñkhoñ ko dariyāoñ kā ḳhitāb mile

mire makān-e-tamannā kī sīḌhiyoñ pe kabhī

tirā shabāb mujhe sūrat-e-gulāb mile

kiran kī nokeñ chubhīñ tan meñ tab huā ehsās

ki ḳhanjaroñ kī tarah mujh se āftāb mile

tumhārī āñkhoñ ke in nīm-vā darīchoñ meñ

azāb-e-dīd kī sūrat shikasta ḳhvāb mile

gunāh ek hī donoñ kā hai to phir ye kyuuñ

use savāb mile aur mujhe azaab mile

mirā salām ġharīb-ul-vatan se kah denā

kabhī jo dasht meñ nezoñ pe āftāb mile

jo teri yaadon se is dil ka aaftab mile

to meri aankhon ko dariyaon ka KHitab mile

mere makan-e-tamanna ki siDhiyon pe kabhi

tera shabab mujhe surat-e-gulab mile

kiran ki noken chubhin tan mein tab hua ehsas

ki KHanjaron ki tarah mujh se aaftab mile

tumhaari aankhon ke in nim-wa darichon mein

azab-e-did ki surat shikasta KHwab mile

gunah ek hi donon ka hai to phir ye kyun

use sawab mile aur mujhe azab mile

mera salam gharib-ul-watan se kah dena

kabhi jo dasht mein nezon pe aaftab mile