jo tez-rau the thi pairon mein jin ke jaan bahut

jo tez-rau the thī pairoñ meñ jin ke jaan bahut

vo log oḌh ke so.e haiñ ab thakān bahut

daroñ meñ qaid kahīñ iḳhtilāf hote haiñ

makīn ho ke bhī rahte haiñ be-makān bahut

na jaane shor uThā kar kahāñ se laa.ī hai

havā ne aaj dikhā.e haiñ mere kaan bahut

ye zindagī bhī ajab raah kī musāfir hai

kahīñ chaḌhān bahut hai kahīñ Dhalān bahut

ye raaz roz koī faash kar hī detā hai

zamīn ḳhud meñ sameTe hai āsmān bahut

zamīñ uThegī nahīñ āsmāñ jhukegā nahīñ

anā-parast haiñ donoñ ke ḳhāndān bahut

kisī kā dard sunūñgā to TuuT jā.ūñgā

mire liye hai faqat merī dāstān bahut

jo tez-rau the thi pairon mein jin ke jaan bahut

wo log oDh ke soe hain ab thakan bahut

daron mein qaid kahin iKHtilaf hote hain

makin ho ke bhi rahte hain be-makan bahut

na jaane shor uTha kar kahan se lai hai

hawa ne aaj dikhae hain mere kan bahut

ye zindagi bhi ajab rah ki musafir hai

kahin chaDhan bahut hai kahin Dhalan bahut

ye raaz roz koi fash kar hi deta hai

zamin KHud mein sameTe hai aasman bahut

zamin uThegi nahin aasman jhukega nahin

ana-parast hain donon ke KHandan bahut

kisi ka dard sununga to TuT jaunga

mere liye hai faqat meri dastan bahut