jo thamte the mera hath buDhe ho gae hain

jo thāmte the mirā haath būḌhe ho ga.e haiñ

tabhī to mere ḳhayālāt būḌhe ho ga.e haiñ

ab is se baḌh ke hameñ aur āzmā.egā kyā

ki chalte chalte tire saath būḌhe ho ga.e haiñ

hamārā bojh uThāne se ab gurezāñ haiñ

tumhāre arz-o-samāvāt būḌhe ho ga.e haiñ

safar mazīd kareñge to gir paḌeñge kahīñ

ki āte-jāte ye din-rāt būḌhe ho ga.e haiñ

jo mere sar kī safedī pe muskurāte the

bas ek raat rahe saath būḌhe ho ga.e haiñ

maiñ nasl-e-nau kā ise almiya samajhtā huuñ

shajar javāñ haiñ magar paat būḌhe ho ga.e haiñ

tumhārī samt se izn-e-kalām miltā nahīñ

mire laboñ pe savālāt būḌhe ho ga.e haiñ

jo thamte the mera hath buDhe ho gae hain

tabhi to mere KHayalat buDhe ho gae hain

ab is se baDh ke hamein aur aazmaega kya

ki chalte chalte tere sath buDhe ho gae hain

hamara bojh uThane se ab gurezan hain

tumhaare arz-o-samawat buDhe ho gae hain

safar mazid karenge to gir paDenge kahin

ki aate-jate ye din-raat buDhe ho gae hain

jo mere sar ki safedi pe muskuraate the

bas ek raat rahe sath buDhe ho gae hain

main nasl-e-nau ka ise almiya samajhta hun

shajar jawan hain magar pat buDhe ho gae hain

tumhaari samt se izn-e-kalam milta nahin

mere labon pe sawalat buDhe ho gae hain