jo the muKhaalif hamin se hum ko wo dekh kar ke sanwar rahe hain

jo the muḳhālif hamīñ se ham ko vo dekh kar ke sañvar rahe haiñ

vafā kī talqīn karne vaale vafā.eñ karne se Dar rahe haiñ

na miltā un ko magar milā hai yahī to qudrat kā faisla hai

jo log karte the kal takabbur vo Tuut kar ab bikhar rahe haiñ

tumhīñ ne kam-zarf kah ke jin ko nikāl rakkhā thā mahfiloñ se

vahī sitāre jo kal the Duube vo aaj dekho ubhar rahe haiñ

hazār vā'de kiye unhoñ ne magar vo vā'doñ pe aa na paa.e

bharosa jin pe kiyā thā ham ne zabāñ se apnī mukar rahe haiñ

jo toḌte the kisī ke dil ko samajh ke miTTī kā ik khilaunā

ye koī ham se batā rahā thā vo aaj ghuT ghuT ke mar rahe haiñ

suno ai 'minhāj' qais-o-līlā kī dāstān-e-vafā yahī hai

vafā ke raste pe marne vaale yahāñ hamesha amar rahe haiñ

jo the muKHalif hamin se hum ko wo dekh kar ke sanwar rahe hain

wafa ki talqin karne wale wafaen karne se Dar rahe hain

na milta un ko magar mila hai yahi to qudrat ka faisla hai

jo log karte the kal takabbur wo Tut kar ab bikhar rahe hain

tumhin ne kam-zarf kah ke jin ko nikal rakkha tha mahfilon se

wahi sitare jo kal the Dube wo aaj dekho ubhar rahe hain

hazar wa'de kiye unhon ne magar wo wa'don pe aa na pae

bharosa jin pe kiya tha hum ne zaban se apni mukar rahe hain

jo toDte the kisi ke dil ko samajh ke miTTi ka ek khilauna

ye koi hum se bata raha tha wo aaj ghuT ghuT ke mar rahe hain

suno ai 'minhaj' qais-o-lila ki dastan-e-wafa yahi hai

wafa ke raste pe marne wale yahan hamesha amar rahe hain