jo tere dard ka aazar liye phirte hain

jo tire dard kā āzār liye phirte haiñ

muzhda-e-tāle’-e-bedār liye phirte haiñ

ham har ik baat kā me'yār liye phirte haiñ

muft kā jaan ko āzār liye phirte haiñ

jis ke har ḳhaar meñ kaifiyyat-e-gul pinhāñ ho

ham tasavvur meñ vo gulzār liye phirte haiñ

tujh se kis ġham kī tamanna-e-talāfī karte

saikḌoñ ġham tire bīmār liye phirte haiñ

zindagī-bhar jo na ā.eñge zabāñ par shāyad

dil meñ ham aise bhī asrār liye phirte haiñ

dil meñ har chand yagānoñ kā gila hai lekin

lab pe ham shikva-e-aġhyār liye phirte haiñ

dair se us ko ta'alluq na haram se nisbat

jo taḌap tere talabgār liye phirte haiñ

ham tirī bazm meñ ho jaate haiñ shāmil to magar

aaj tak hasrat-e-guftār liye phirte haiñ

ye fazāoñ meñ bhaTakte hue zarre 'farhat'

ik na.e daur ke āsār liye phirte haiñ

jo tere dard ka aazar liye phirte hain

muzhda-e-tale’-e-bedar liye phirte hain

hum har ek baat ka me'yar liye phirte hain

muft ka jaan ko aazar liye phirte hain

jis ke har KHar mein kaifiyyat-e-gul pinhan ho

hum tasawwur mein wo gulzar liye phirte hain

tujh se kis gham ki tamanna-e-talafi karte

saikDon gham tere bimar liye phirte hain

zindagi-bhar jo na aaenge zaban par shayad

dil mein hum aise bhi asrar liye phirte hain

dil mein har chand yaganon ka gila hai lekin

lab pe hum shikwa-e-aghyar liye phirte hain

dair se us ko ta'alluq na haram se nisbat

jo taDap tere talabgar liye phirte hain

hum teri bazm mein ho jate hain shamil to magar

aaj tak hasrat-e-guftar liye phirte hain

ye fazaon mein bhaTakte hue zarre 'farhat'

ek nae daur ke aasar liye phirte hain