jo tere husn ke qarin se gae

jo tire husn ke qarīñ se ga.e

vo to duniyā samet diiñ se ga.e

vo ki rahtā thā jin makānoñ meñ

ab vo saare makāñ makīñ se ga.e

hausla is qadar kahāñ sab meñ

ham tire ishq-e-be-yaqīñ se ga.e

maut aa.ī hameñ tire dar par

ham ga.e bhī to āfrīñ se ga.e

ik tirā but tarāshne ke liye

kitne sajde mirī jabīñ se ga.e

jis jagah qais kā Thikāna thā

aaj ushshāq sab vahīñ se ga.e

us zamīñ-zād kī jhalak ke liye

kis qadar āsmāñ zamīñ se ga.e

āstīñ kyā ga.ī 'ḳhizar' merī

saare ahbāb āstīñ se ga.e

jo tere husn ke qarin se gae

wo to duniya samet din se gae

wo ki rahta tha jin makanon mein

ab wo sare makan makin se gae

hausla is qadar kahan sab mein

hum tere ishq-e-be-yaqin se gae

maut aai hamein tere dar par

hum gae bhi to aafrin se gae

ek tera but tarashne ke liye

kitne sajde meri jabin se gae

jis jagah qais ka Thikana tha

aaj ushshaq sab wahin se gae

us zamin-zad ki jhalak ke liye

kis qadar aasman zamin se gae

aastin kya gai 'KHizar' meri

sare ahbab aastin se gae